甄美玉
2016 年史提反舉辦「當跑的路」佈道會，當時我仍係組牧，有位家長問：「有冇人知史家對上一次攪佈道會係幾時? 」，大家都推算唔到係邊一年，我話：「1988 年攪過一個《愛的呼喚》佈道會。」「嘩⋯⋯」大家都估唔到呢個就係上一次攪嘅佈道會，原來已相隔28 年。
1988 年我地想攪個音樂佈道會，呢個任務交左俾阿古，佢就揾左史家所有唱得、彈得嘅人組成一隊樂隊。我地用左大半年時間去籌備呢個以詩歌為主嘅佈道會，過程好艱辛（下刪500 字）。舞台背景以轉換不同幻燈片去配合每首歌嘅歌詞，負責人特別跟據歌詞去搜尋或拍攝合用嘅相片制作成slide，當晚睇完嘅人話⋯⋯D slide 好配合、好正。
31 年前嘅佈道會，冇留低任何照片、程序表、錄音或錄像。幸好之前係一堆舊物中，發現當年佈道會台詞嘅手稿，咁先保留到部份資料。
日期：一九八八年九月十七日禮拜六晚上
主題：愛的呼喚
地點：永光書院舊禮堂
樂隊成員：古偉權、甄美玉、利倩雲、楊舒翹、駱景華、黃國豪、葉志文、林丘玲
幻燈片：劉文偉
短講：唔係陸偉生就係鄧瑞强
獻唱詩歌排序：
信念、一首愛歌、無言者、借來的美夢、偶像、In The Image of God、祂的一生、耶穌豈是凡人、生之盼、耶穌是我的知心友、默默回望、愛的呼喚。
史提反由「愛的呼喚」到「當跑的路」，見証到時代嘅變化、人物嘅交替、圑隊嘅壯大。史提反要繼續成長，努力傳主福音啊！